What maketh this but Jupiter the king?
The which is prince, and cause of alle thing,
Converting alle unto his propre wille,
From which it is derived, soth to telle.
And here-againes no creature on live
Of no degree availleth for to strive.
Than is it wisdom, as it thinketh me,
To maken vertue of necessite,
And take it wel, that we may not eschewe,
And namely that to us all is dewe.
And who so grutcheth ought, he doth folie,
And rebel is to him that all may gie.
And certainly a man hath most honour
To dien in his excellence and flour,
Whan he is siker of his gcode name.
Than hath he don his frend, ne him, no shame;
And glader ought his frend ben of his deth.
Whan with honour is yolden up his breth,
Than whan his name appalled is for age;
For all foryetten is his vassallage.
Than is it best, as for a worthy fame,
To dien whan a man is best of name.
The contrary of all this is wilfulnesse.
Why grutchen we? why have we hevinesse,
That good Arcite, of chivalry the flour,
Departed is, with dutee and honour,
Out of this foule prison of this lif?
Why grutchen here his cosin and his wif
Of his welfare, that loven him so wel?
Can he hem thank? nay, God wot, never a del,
That both his soule, and eke hemself offend,
And yet they mow hir lustes not amend.
"What may I conclude of this longe serie,
But after sorwe I rede us to be merie,
And thanken Jupiter of all his grace.
And er that we departen from this place,
I rede that we make of sorwes two
O parfit joye lasting evermo:
And loketh now wher most sorwe is herein,
Ther wol I firste amenden and begin.
"Sister," quod he "this is my full assent,
With all th' avis here of my parlement,
That gentil Palamon, your owen knight,
That serveth you with will, and herte, and might,
And ever hath don, sin ye first him knew,
That ye shall of your grace upon him rew,
And taken him for husbond and for lord:
Lene me your hand, for this is oure accord.
"Let see now of your womanly pitee.
He is a kinges brothers sone pardee,
And though he were a poure bachelere,
Sin he hath served you so many a yere,
And had for you so gret adversite,
It moste ben considered, leveth me.
For gentil mercy oweth to passen right."
Than sayd he thus to Palamon the knight;
"I trow ther nedeth litel sermoning
To maken you assenten to this thing.
Cometh ner, and take your lady by the hond."
Betwixen hem was maked anon the bond,
That highte matrimoine or mariage,
By all the conseil of the baronage.
And thus with alle blisse and melodie
Hath Palamon ywedded Emelie.
And God that all this wide world hath wrought,
Send him his love, that hath it dere ybought.
For now is Palamon in alle wele,
Living in blisse, in richesse, and in hele,
And Emelie him loveth so tendrely,
And he hire serveth al so gentilly,
That never was ther no word hem betwene
Of jalousie, ne of non other tene.
Thus endeth Palamon and Emelie ;
And God save all this fayre compagnie.
O SCATHFUL harm, condition of poverte,
With thirst, with cold, with hunger so confounded,
To asken helpe thee shameth in thin herte,
If thou non ask, so sore art thou ywounded,
That veray nede unwrappeth al thy wound hid.
Maugre thin hed thou must for indigence
Or stele, or begge, or borwe thy dispence.
Thou blamest Crist, and sayst ful bitterly,
He misdeparteth richesse temporal;
Thy neighebour thou witest sinfully,
And sayst, thou hast to litel, and he hath all:
Parfay (sayst thou) somtime he reken shall,
Whan that his tayl shal brennen in the glede,
For he nought helpeth needful in hir nede.
If thou be poure, thy brother hateth thee,
And all thy frendes fleen fro thee, alas!
O riche marchants, ful of wele ben ye,
O noble, o prudent folk, as in this cas,
Your bagges ben not filled with ambes as,
But with sis cink, that renneth for your chance;
At Cristenmasse, mery may ye dance.
Now fell it, that the maisters of that sort
Han shapen hem to Rome for to wende,
Were it for chapmanhood, or for disport,
Non other message wold they thider sende,
But comen hemself to Rome, this is the ende ;
And in swiche place as thought hem avantage
For hire entente, they taken hir herbergage.
Sojourned han these marchants in that toun
A certain time, as fell to hir plesance :
And so befell, that the excellent renoun
Of the emperoures doughter dame Custance
Reported was, with every circumstance,
Unto these Surrien marchants, in swiche wise
Fro day to day, as I shal you devise.
This was the commun vois of every man :
"Our emperour of Rome, God him se,
A doughter hath, that sin the world began,'
To reken as wel hire goodnesse as beaute,
N'as never swiche another as is she:
I pray to God in honour hire sustene,
And wold she were of all Europe the quene.
"In hire is high beaute withouten pride,
Youthe, withouten grenehed or folie:
To all hire werkes vertue is hire guide;
Humblesse hath slaien in hire tyrannie :
She is a mirrour of alle curtesie,
Hire herte is veray chambre of holinesse,
Hire hond ministre of fredom for almesse."
And al this vois was soth, as God is trewe,
But now to purpos let us turne agein.
These marchants han don fraught hir shippes newe,
And whan they han this blisful maiden sein,
Home to Surrie ben they went ful fayn,
And don hir nedes, as they han don yore,
And liven in wele, I can say you no more.
Now fell it, that these marchants stood in grace
Of him that was the Soudan of Surrie :
For whan they came from any strange place
He wold of his benigne curtesie
Make hem good chere, and besily espie
Tidings of sundry regnes, for to lere
The wonders that they mighte seen or here.
Amonges other thinges specially
These marchants han him told of dame Custance
So gret noblesse, in ernest seriously,
That this Soudan hath caught so gret plesance
To han hire figure in his remembrance,
That all his lust, and all his besy cure
Was for to love hire, while his lif may dure.
Paraventure in thilke large book,
Which that men clepe the heven, ywriten was
With sterres, whan that he his birthe took,
That he for love shuld han his deth, alas!
For in the sterres, clerer than is glas,
Is writen, God wot, who so coud it rede,
The deth of every man withouten drede.
In sterres many a winter therbeforn
Was writ the deth of Hector, Achilles,
Of Pompey, Julius, or they were born;
The strif of Thebes; and of Hercules,
Of Sampson, Turnus, and of Socrates
The deth; but mennes wittes ben so dull,
That no wight can wel rede it at the full.
This Soudan for his prive councel sent,
And shortly of this matere for to pace,
He hath to hem declared his entent,
And sayd hem certain, but he might have grace
To han Custance, within a litel space,
He n'as but ded, and charged hem in hie
To shapen for his lif som remedie.
Diverse men, diverse thinges saiden;
They argumentes casten up and doun;
Many a subtil reson forth they laiden;
They speken of magike, and abusion;
But finally, as in conclusion,
They cannot seen in that non avantage,
Ne in non other way, save mariage.
Than saw they therin swiche difficultee
By way of reson, for to speke all plain,
Because ther was swiche diversitee
Betwene hir bothe lawes, that they sayn,
They trowen that no Cristen prince wold fayn
Wedden his child under our lawe swete,
That us was yeven by Mahound our prophete.
And he answered: "Rather than I lese
Custance, I wol be cristened douteles :
I mote ben hires, I may non other chese,
I pray you hold your arguments in pees,
Saveth my lif, and beth not reccheles
To geten hire that hath my lif in cure,
For in this wo I may not long endure."
What nedeth greter dilatation?
I say, by tretise and ambassatrie,
And by the popes mediation,
And all the chirche, and all the chevalrie,
That in destruction of Maumetrie,
And in encrese of Cristes lawe dere,
They ben accorded so as ye may here;
How that the Soudan and his baronage,
And all his lieges shuld ycristened be,
And he shal han Custance in mariage,
And certain gold, I n'ot what quantitee,
And hereto finden suffisant suretee.
The same accord is sworne on eyther side;
Now, fair Custance, Almighty God thee gide.
Now wolden som men waiten, as I gesse,
That I shuld tellen all the purveiance,
The which that the emperour of his noblesse
Hath shapen for his doughter dame Custance.
Wel may men know that so gret ordinance
May no man tellen in a litel clause,
As was arraied for so high a cause.
Bishopes ben shapen with hire for to wende,
Lordes, ladies, and knightes of renoun,
And other folk ynow, this is the end.
And notified is thurghout al the toun,
That every wight with gret devotioun
Shuld prayen Crist, that he this mariage
Receive in gree, and spede this viage.
The day is comen of hire departing,
I say the woful day fatal is come,
That ther may be no longer tarying,
But forward they hem dressen all and some.
Custance, that was with sorwe all overcome,
Ful pale arist, and dresseth hire to wende,
For wel she seth ther n'is non other ende.
Alas! what wonder is it though she wept?
That shal be sent to straunge nation
Fro frendes, that so tendrely hire kept,
And to be bounde under subjection
Of on, she knoweth not his condition.
Housbondes ben all good, and han ben yore,
That knowen wives, I dare say no more.
"Fader," she said, "thy wretched child Custance,
Thy yonge doughter, fostered up so soft,
And ye, my moder, my soveraine plesance
Over all thing, (out taken Crist on loft)
Custance your child hire recommendeth oft
Unto your grace; for I shal to Surrie,
Ne shal I never seen you more with eye.
"Alas! unto the Barbare nation
I muste gon, sin that it is your will:
But Crist, that starfe for our redemption,
So yeve me grace his hestes to fulfill,
I wretched woman no force though I spill;
Women arn borne to thraldom and penance,
And to ben under mannes governance."
I trowe at Troye whan Pirrus brake the wall,
Or Ilion brent, or Thebes the citee,
Ne at Rome for the harm thurgh Hanniball,
That Romans hath venqueshed times three,
N'as herd swiche tendre weping for pitee,
As in the chambre was for hire parting,
But forth she mote, wheder she wepe or sing.
O firste moving cruel firmament,
With thy diurnal swegh that croudest ay,
And hurtlest all from est till occident,
That naturally wold hold another way;
Thy crouding set the heven in swiche array
At the beginning of this fierce viage,
That cruel Mars hath slain this marriage.
Infortunat ascendent tortuous,
Of which the lord is helpeles fall, alas!
Out of his angle into the derkest hous.
O Mars, o Atyzar, as in this cas;
O feble Mone, unhappy ben thy pas,
Thou knittest thee ther thou art not received,
Ther thou were wel fro thennes art thou weived.
Imprudent emperour of Rome, alas!
Was ther no philosophre in al thy toun?
Is no time bet than other in swiche cas?
Of viage is ther non electioun,
Namely to folk of high conditioun,
Nat whan a rote is of a birth yknowe?
Alas! we ben to lewed, or to slow.
To ship is brought this woful faire maid
Solempnely, with every circumstance :
"Now Jesu Crist be with you all," she said.
Ther n'is no more, but " Farewel, fair Custance."
She peineth hire to make good countenance,
And forth I let hire sayle in this manere,
And turne I wol againe to my matere.
The mother of the Soudan, well of vices,
Espied hath hire sones plein entente,
How he wol lete his olde sacrifices:
And right anon she for her conseil sente,
And they ben comen, to know what she mente,
And whan assembled was this folk in fere,
She set hire doun, and sayd as ye shul here.
"Lordes," she sayd, "ye knowen everich on,
How that my sone in point is for to lete
The holy lawes of our Alkaron,
Yeven by Goddes messager Mahomete:
But on avow to grete God I hete,
The lif shal rather out of my body sterte,
Than Mahometes lawe out of myn herte.
"What shuld us tiden of this newe lawe
But thraldom to our bodies and penance,
And afterward in helle to ben drawe,
For we reneied Mahound our creance?
But, lordes, wol ye maken assurance,
As I shal say, assenting to my lore?
And I shal make us sauf for evermore."
They sworen, and assented every man
To live with hire and die, and by hire stond:
And everich on, in the best wise he can,
To strengthen hire shal al his frendes fond.
And she hath this emprise ytaken in hond,
Which ye shull heren that I shal devise,
And to hem all she spake right in this wise.
"We shul first feine us Cristendom to take;
Cold water shal not greve us but a lite:
And I shal swiche a feste and revel make,
That, as I trow, I shal the Soudan quite.
For tho his wif be cristened never so white,
She shal have nede to wash away the rede,
Though she a font of water with hire lede."
O Soudannesse, rote of iniquitee,
Virago thou Semyramee the second,
O serpent under femininitee,
Like to the serpent depe in helle ybound:
O feined woman, all that may confound
Vertue and innocence, thurgh thy malice
Is bred in thee, as nest of every vice.
O Sathan envious, sin thilke day
That thou were chased from our heritage,
Wel knowest thou to woman the olde way.
Thou madest Eva bring us in servage,
Thou wolt fordon this cristen mariage :
Thin instrument so (wala wa the while!)
Makest thou of women whan thou wolt begile.
This Soudannesse, whom I thus blame and warrie,
Let prively hire conseil gon hir way:
What shuld I in this tale longer tarie?
She rideth to the Soudan on a day,
And sayd him, that she wold reneie hire lay,
And Cristendom of prestes hondes fong,
Repenting hire she hethen was so long;
Beseching him to don hire that honour,
That she might han the Cristen folk to fest:
"To plesen hem I wol do my labour."
The Soudan saith, "I wol don at your hest,"
And kneling, thanked hire of that request;
So glad he was, he n'iste not what to say,
She kist hire sone, and home she goth hire way.
Arrived ben these Cristen folk to lond
In Surrie, with a gret solempne route,
And hastily this Soudan sent his sond,
First to his mother, and all the regne aboute,
And sayd, his wif was comen out of doute,
And praide hem for to riden again the quene,
The honour of his regne to sustene.
Gret was the presse, and riche was th' array
Of Surriens and Romanes met in fere.
The mother of the Soudan riche and gay
Received hire with all so glad a chere,
As any mother might hire doughter dere:
And to the nexte citee ther beside
A softe pas solempnely they ride.
Nought trow I, the triumph of Julius,
Of which that Lucan maketh swiche a bost,
Was realler, or more curious,
Than was th' assemblee of this blisful host :
Butte this scorpion, this wicked gost,
The Soudannesse, for all hire flattering
Cast under this ful mortally to sting.
The Soudan cometh himself sone after this
So really, that wonder is to tell :
And welcometh hire with alle joye and blis.
And thus in mirth and joye I let hem dwell.
The fruit of this matere is that I tell.
Whan time came, men thought it for the best
That revel stint, and men go to hir rest.
The time come is, this olde Soudannesse
Ordeined hath the feste of which I tolde,
And to the feste Cristen folk hem dresse
In general, ya bothe yonge and olde.
Ther may men fest and realtee beholde,
And deintees mo than I can you devise,
But all to dere they bought it or they rise.
O soden wo, that ever art successour
To worldly blis, spreint is with bitternesse
Th' ende of the joye of our worldly labour:
Wo occupieth the fyn of our gladnesse.
Herken this conseil for thy sikernesse :
Upon thy glade day have in thy minde
The unware wo of harm, that cometh behinde.
For shortly for to tellen at a word,
The Soudan and the Cristen everich on
Ben all to-hewe, and stiked at the bord,
But it were only dame Custance alone.
This olde Soudannesse, this cursed crone,
Hath with hire frendes don this cursed dede,
For she hireself wold all the contree lede.
Ne ther was Surrien non that was converted,
That of the conseil of the Soudan wot,
That he n'as all to-hewe, er he asterted:
And Custance han they taken anon fote-hot,
And in a ship all stereles (God wot)
They han hire set, and bidden hire lerne sayle
Out of Surrie againward to Itaille.
A certain tresor that she thither ladde,
And soth to sayn, vitaille gret plentee,
They han hire yeven, and clothes eke she hadde,
And forth she sayleth in the salte see:
O my Custance, full of benignitee,
O emperoures yonge doughter dere,
He that is lord of fortune be thy stere.
She blesseth hire, and with ful pitous vois
Unto the crois of Crist thus sayde she.
“O clere, o weleful auter, holy crois,
Red of the lambes blood ful of pitee,
That wesh the world fro the old iniquitee,
Me fro the fende, and fro his clawes kepe,
That day that I shal drenchen in the depe.
"Victorious tree, protection of trewe,
That only worthy were for to bere
The king of heven, with his woundes newe,
The white lamb, that hurt was with a spere;
Flemer of fendes, out of him and here
On which thy limmes faithfully extenden,
Me kepe, and yeve me might my lif to amenden."
Yeres and dayes fleet this creature
Thurghout the see of Grece, unto the straite
Of Maroc, as it was hire aventure:
On many a sory mele now may she baite,
After hire deth ful often may she waite,
Or that the wilde waves wol hire drive
Unto the place ther as she shal arive.
Men mighten asken, why she was not slain?
Eke at the feste who might hire body save?
And I answer to that demand again,
Who saved Daniel in the horrible cave,
Ther every wight, save he, master or knave,
Was with the leon frette, or he asterte?
No wight but God, that he bare in his herte.
God list to shew his wonderful miracle
In hire, for we shuld seen his mighty werkes :
Crist, which that is to every harm triacle,
By certain menes oft, as knowen clerkes,
Doth thing for certain ende, that ful derke is
To mannes wit, that for our ignorance
Ne can nat know his prudent purveiance.
Now sith she was not at the feste yslawe,
Who kepte hire fro the drenching in the see?
Who kepte Jonas in the fishes mawe,
Til he was spouted up at Ninivee?
Wel may men know, it was no wight but he
That kept the peple Ebraike fro drenching,
With drye feet thurghout the see passing.
Who bade the foure spirits of tempest,
That power han to anoyen lond and see,
Both north and south, and also west and est,
Anoyen neyther see, ne lond, ne tree?
Sothly the commander of that was he
That fro the tempest ay this woman kepte,
As wel whan she awoke as whan she slepte.
Wher might this woman mete and drinke have?
Three yere and more, how lasteth hire vitaille?
Who fed the Egyptian Mary in the cave
Or in desert? no wight but Crist sans faille.
Five thousand folk it was as gret marvaille
With loves five and fishes two to fede:
God sent his foyson at hire grete nede.
She driveth forth into our ocean
Thurghout our wide see, til at the last
Under an hold, that nempnen I ne can,
Fer in Northumberlond, the wave hire cast,
And in the sand hire ship stiked so fast,
That thennes wolde it not in all a tide :
The wille of Crist was that she shulde abide.
The constable of the castle doun is fare
To seen this wrecke, and al the ship he sought,
And fond this wery woman full of care;
He fond also the tresour that she brought:
In hire langage mercy she besought,
The lif out of hire body for to twinne,
Hire to deliver of wo that she was inne.
A maner Latin corrupt was hire speche,
But algate therby was she understond.
The constable, whan him list no lenger seche,
This woful woman brought he to the lond.
She kneleth doun, and thanketh Goddes sond;
But what she was, she wolde no man seye
For foule ne faire, though that she shulde deye.
She said, she was so mased in the see,
That she forgate hire minde, by hire trouth.
The constable hath of hire so gret pitee
And eke his wif, that they wepen for routh:
She was so diligent withouten slouth
To serve and plesen everich in that place,
That all hire love, that loken in hire face.
The constable and dame Hermegild his wif
Were payenes, and that contree every wher;
But Hermegild loved Custance as hire lif;
And Custance hath so long sojourned ther
In orisons, with many a bitter tere,
Til Jesu hath converted thurgh his grace
Dame Hermegild, constablesse of that place.
In all that lond no Cristen dorste route;
All Cristen folk ben fled fro that contree
Thurgh payenes, that conquereden all aboute
The plages of the north by lond and see.
To Wales fled the Cristianitee
Of olde Bretons, dwelling in this ile;
Ther was hir refuge for the mene while.
But yet n'ere Cristen Bretons so exiled,
That ther n'ere som which in hir privitee
Honoured Crist, and hethen folk begiled;
And neigh the castle swiche ther dwelten three :
That on of hem was blind, and might not see,
But it were with thilke eyen of his minde,
With which men mowen see whan they ben blinde.
Bright was the sonne, as in that sommers day,
For which the constable and his wif also
And Custance, han ytake the right way
Toward the see, a furlong way or two,
To plaien, and to romen to and fro;
And in hir walk this blinde man they mette,
Croked and olde, with eyen fast yshette.
"In the name of Crist," cried this blinde Breton,
"Dame Hermegild, yeve me my sight again."
This lady wexe afraied of that soun,
Lest that hire husbond, shortly for to sain,
Wold hire for Jesu Cristes love have slain,
Til Custance made hire bold, and bad hire werche
The will of Crist, as doughter of holy cherche.
The constable wexe abashed of that sight,
And sayde; "What amounteth all this fare?"
Custance answered; "Sire, it is Cristes might,
That helpeth folk out of the fendes snare :
And so ferforth she gan our lay declare,
That she the constable, er that it were eve,
Converted, and on Crist made him beleve.
This constable was not lord of the place
Of which I speke, ther as he Custance fond,
But kept it strongly many a winter space,
Under Alla, king of Northumberlond,
That was ful wise, and worthy of his hond
Againe the Scottes, as men may wel here;
But tourne I wol againe to my matere.
Sathan, that ever us waiteth to begile,
Saw of Custance all hire perfectioun,
And cast anon how he might quite hire wile,
And made a yonge knight, that dwelt in that toun,
Love hire so hote of foule affectioun,
That veraily him thought that he shuld spille,
But he of hire might ones han his wille.
He woeth hire, but it availeth nought,
She wolde do no sinne by no wey :
And for despit, he compassed his thought
To maken hire on shameful deth to dey.
He waiteth whan the constable is away,
And prively upon a night he crepte
In Hermegildes chambre while she slepte.
Wery, forwaked in hire orisons,
Slepeth Custance, and Hermegilde also.
This knight, thurgh Sathanas temptations,
All softely is to the bed ygo,
And cut the throte of Hermegilde atwo,
And layd the blody knif by Dame Custance,
And went his way, ther God yeve him mischance.
Sone after cometh this constable home again,
And eke Alla, that king was of that lond,
And saw his wife despitously yslain,
For which ful oft he wept and wrong his hond;
And in the bed the blody knif he fond
By dame Custance, alas! what might she say?
For veray wo hire wit was all away.
To king Alla was told all this mischance,
And eke the time, and wher, and in what wise,
That in a ship was fonden this Custance,
As here before ye han herd me devise:
The kinges herte of pitee gan agrise,
Whan he saw so benigne a creature
Falle in disese and in misaventure.
For as the lamb toward his deth is brought,
So stant this innocent beforn the king:
This false knight, that hath this treson wrought,
Bereth hire in hond that she hath don this thing:
But natheles ther was gret murmuring
Among the peple, and sayn they cannot gesse
That she had don so gret a wickednesse.
For they han seen hire ever so vertuous,
And loving Hermegild right as hire lif:
Of this bare witnesse everich in that hous,
Save he that Hermegild slow with his knif:
This gentil king hath caught a gret motif
Of this witness, and thought he wold enquere
Deper in this cas, trouthe for to lere.
Alas! Custance, thou hast no champion,
Ne fighten canst thou not, so wala wa !
But he that starf for our redemption,
And bond Sathan, and yet lith ther he lay,
So be thy stronge champion this day:
For but if Crist on thee miracle kithe,
Withouten gilt thou shalt be slaine as swithe.
She set hire doun on knees, and thus she sayde;
"Immortal God, that savedest Susanne
Fro false blame, and thou merciful mayde,
Mary I mene, doughter to seint Anne,
Beforn whos child angels singen Osanne,
If I be gilteles of this felonie,
My socour be, or elles shal I die."
Have ye not seen somtime a pale face
(Among a prees) of him that hath been lad
Toward his deth, wher as he geteth no grace,
And swiche a colour in his face hath had,
Men mighten know him that was so bestad,
Amonges all the faces in that route,
So stant Custance, and loketh hire aboute.
|