O quenes living in prosperitee, Duchesses, and ye ladies everich on, Haveth som routhe on hire adversitee; An emperoures doughter stant alone;
She hath no wight to whom to make hire mone: O blood real, that stondest in this drede, Fer ben thy frendes in thy grete nede.
This Alla king hath swiche compassioun, As gentil herte is fulfilled of pitee, That fro his eyen ran the water doun. "Now hastily do fecche a book," quod he; "And if this knight wol sweren, how that she This woman slow, yet wol we us avise, Whom that we wol that shal ben our justice."
A Breton book, written with Evangiles, Was fet, and on this book he swore anon She giltif was, and in the mene whiles
An hond him smote upon the nekke bone, That doun he fell at ones as a stone: And both his eyen brost out of his face In sight of every body in that place.
A vois was herd, in general audience, That sayd; "Thou hast desclandered gilteles The doughter of holy chirche in high presence; Thus hast thou don, and yet hold I my pees.' Of this mervaille agast was all the prees, As mased folk they stonden everich on For drede of wreche, save Custance alone.
Gret was the drede and eke the repentance Of hem that hadden wronge suspection Upon this sely innocent Custance; And for this miracle, in conclusion, And by Custances mediation,
The king, and many another in that place, Converted was, thanked be Cristes grace.
This false knight was slain for his untrouthe By jugement of Alla hastily;
And yet Custance had of his deth gret routhe; And after this Jesus of his mercy Made Alla wedden full solempnely
This holy woman, that is so bright and shene, And thus hath Crist ymade Custance a quene.
But who was woful (if I shal not lie) Of this wedding but Donegild and no mo, The kinges mother, ful of tyrannie? Hire thoughte hire cursed herte brast atwo; She wolde not that hire sone had do so; Hire thoughte a despit, that he shulde take So strange a creature unto his make.
Me list not of the chaf ne of the stre Maken so long a tale, as of the corn. What shulde I tellen of the realtee
Of this mariage, or which cours goth beforn, Who bloweth in a trompe or in an horn? The fruit of every tale is for to say;
On hire he gat a knave childe anon, And to a bishop, and his constable eke He toke his wif to kepe, whan he is gon To Scotland ward, his fomen for to seke. Now faire Custance, that is so humble and meke, So long is gon with childe til that still She halt hire chambre, abiding Cristes will.
The time is come, a knave child she bere; Mauricius at the fontstone they him calle. This constable doth forth come a messager, And wrote unto his king that cieped was Alle, How that this blisful tiding is befalle, And other tidings spedeful for to say.
He hath the lettre, and forth he goth his way.
This messager, to don his avantage, Unto the kinges mother rideth swithe, And salueth hire ful faire in his langage. "Madame," quod he, "ye may be glad and blithe, And thanken God an hundred thousand sithe; My lady quene hath child, withouten doute, To joye and blisse of all this regne aboute.
"Lo here the lettre seled of this thing, That I most bere in all the hast I may : If ye wol ought unto your sone the king, I am your servant bothe night and day. Donegilde answered, "As now at this time nay; But here I wol all night thou take thy rest, To-morwe wol I say thee what me lest."
This messager drank sadly ale and wine, And stolen were his lettres prively Out of his box, while he slept as a swine; And contrefeted was ful subtilly Another lettre, wrought ful sinfully, Unto the king directe of this matere Fro his constable, as ye shal after here.
This lettre spake, the quene delivered was Of so horrible a fendliche creature, That in the castle non so hardy was That any while dorste therein endure: The mother was an elfe by aventure Ycome, by charmes or by sorcerie, And everich man hateth hire compagnie.
Wo was this king whan he this lettre had sein, But to no wight he told his sorwes sore, But of his owen hand he wrote again; "Welcome the sonde of Crist for evermore To me, that am now lerned in his lore: Lord, welcome be thy lust and thy plesance, My lust I put all in thyn ordinance.
"Kepeth this child, al be it foule or faire, And eke my wif, unto min home coming: Crist whan him list may senden me an heire, More agreable than this to my liking." This lettre he seled, prively weping, Which to the messager was taken sone,
They ete and drinke, and dance, and sing, and play. And forth he goth, ther is no more to done.
They gon to bed, as it was skill and right, For though that wives ben ful holy thinges, They mosten take in patience a night
Swiche a maner necessaries, as ben plesinges To folk that han ywedded hem with ringes, And lay a lite hir holinesse aside As for the time, it may no bet betide.
O messager, fulfilled of dronkennesse, Strong is thy breth, thy limmes faltren ay, And thou bewreiest alle secrenesse ; Thy mind is lorne, thou janglest as a jay; Thy face is tourned in a new array; Ther dronkenesse regneth in any route, Ther is no conseil hid withouten doute.
O Donegild, I ne have non English digne Unto thy malice, and thy tirannie: And therfore to the fende I thee resigne, Let him enditen of thy traitorie.
Fy mannish, fy; o nay by God I lie; Fy fendliche spirit, for I dare wel telle, Though thou here walke, thy spirit is in helle.
This messager cometh fro the king again, And at the kinges modres court he light, And she was of this messager ful fayn, And plesed him in all that ever she might. He dranke, and wel his girdel underpight; He slepeth, and he snoreth in his gise All night, until the sonne gan arise.
Eft were his lettres stolen everich on, And contrefeted lettres in this wise.
The king commanded his constable anon Up peine of hanging and of high jewise, That he ne shulde soffren in no wise Custance within his regne for to abide Three daies, and a quarter of a tide;
But in the same ship as he hire fond, Hire and hire yonge sone, and all hire gere He shulde put, and croude hire fro the lond, And charge hire, that she never eft come there. O my Custance, wel may thy ghost have fere, And sleping in thy dreme ben in penance, Whan Donegild cast all this ordinance.
This messager on morwe whan he awoke, Unto the castel halt the nexte way; And to the constable he the lettre toke; And whan that he this pitous lettre sey, Ful oft he sayd " Alas, and wala wa ; [dure? Lord Crist," quod he, "how may this world en- So ful of sinne is many a creature.
"O mighty God, if that it be thy will,
Sin thou art rightful juge, how may it be That thou wolt soffren innocence to spill, And wicked folk regne in prosperitee? A good Custance, alas! so wo is me, That I mote be thy turmentour, or dey On shames deth, ther is non other wey."
Wepen both yong and old in al that place, Whan that the king this cursed lettre sent : And Custance with a dedly pale face The fourthe day toward the ship she went: But natheles she taketh in good entent The will of Crist, and kneling on the strond She sayde, "Lord, ay welcome be thy sond.
"He that me kepte fro the false blame, While I was in the lond amonges you, He can me kepe fro harme and eke fro shame In the salt see, although I se not how : As strong as ever he was, he is yet now, In him trust I, and in his mother dere, That is to me my sail and eke my stere."
Hire litel child lay weping in hire arm, And kneling pitously to him she said, "Pees, litel sone, I wol do thee no harm:"
With that hire couverchief of hire hed she braid, And over his litel eyen she it laid,
And in hire arme she lulleth it ful fast,
And into the heven hire eyen up she cast.
"Mother," quod she, "and mayden bright Marie, Soth is, that thurgh womannes eggement Mankind was lorne, and damned ay to die, For which thy child was on a crois yrent: Thy blisful eyen saw all his turment, Than is ther no comparison betwene Thy wo, and any wo man may sustene.
"Thou saw thy child yslain before thin eyen, And yet now liveth my litel child parfay: Now, lady bright, to whom all woful crien, Thou glory of womanhed, thou faire May, Thou haven of refute, bright sterre of day, Rew on my child, that of thy gentillesse Rewest on every rewful in distresse.
"O litel child, alas! what is thy gilt, That never wroughtest sinne as yet parde? Why wol thin harde father have thee spilt? O mercy, dere constable," quod she, "As let my litel child dwell here with thee: And if thou darst not saven him fro blame, So kisse him ones in his fadres name."
Therwith she loketh backward to the lond, And saide; " Farewel, housbond routheles! And up she rist, and walketh doun the strond Toward the ship, hire foloweth all the prees: And ever she praieth hire child to hold his pees, And taketh hire leve, and with an holy entent She blesseth hire, and into the ship she went.
Vitailled was the ship, it is no drede, Habundantly for hire a ful long space: And other necessaries that shuld nede She had ynow, heried be Goddes grace: For wind and wether, Almighty God purchace, And bring hire home, I can no better say, But in the see she driveth forth hire way.
Alla the king cometh home sone after this Unto his castel, of the which I told, And asketh wher his wif and his child is; The constable gan about his herte cold, And plainly all the matere he him told As ye han herd, I can tell it no better, And shewed the king his sele and his letter;
And sayde; "Lord, as ye commanded me Up peine of deth, so have I don certain." This messager turmented was, til he Moste beknowe, and tellen plat and plain, Fro night to night in what place he had lain : And thus by wit and subtil enquering Imagined was by whom this harm gan spring.
The hand was knowen that the lettre wrote, And all the venime of this cursed dede; But in what wise, certainly I n'ot.
The effect is this, that Alla out of drede His moder slew, that moun men plainly rede, For that she traitour was to hire ligeance : Thus endeth this old Donegild with meschance.
The sorwe that this Alla night and day Maketh for his wif and for his child also, Ther is no tonge that it tellen may. But now wol I agen to Custance go, That fleteth in the see in peine and wo Five yere and more, as liked Cristes sonde, Or that hire ship approched to the londe.
Under an hethen castel at the last, (Of which the name in my text I not find) Custance and eke hire child the see up cast. Almighty God, that saved all mankind,
Have on Custance and on hire child som mind, That fallen is in hethen hond eftsone In point to spill, as I shal tell you sone.
Doun fro the castel cometh ther many a wight To gauren on this ship, and on Custance: But shortly fro the castel on a night The lordes steward (God yeve him meschance) A theef, that had reneyed our creance, Came into the ship alone, and said, he wolde Hire lemman be, whether she wolde or n'olde.
Wo was this wretched woman tho begon, Hire childe cried, and she cried pitously: But blisful Mary halpe hire right anon, For with hire strogling wel and mightily The theef fell over bord al sodenly,
And in the see he drenched for vengeance,
And thus hath Crist unwemmed kept Custance.
O foule lust of luxurie, lo thin ende, Nat only that thou faintest mannes mind, But veraily thou wolt his body shende. Th' ende of thy werk, or of thy lustes blind, Is complaining: how many may men find, That not for werk somtime, but for th' entent To don this sinne, ben other slain or shent.
How may this weke woman han the strength Hire to defend again this renegate? O Golias, unmesurable of length, How mighte David maken thee so mate? So yonge, and of armure so desolate, How dorst he loke upon thy dredful face? Wel may men seen it was but Goddes grace.
Who yaf Judith corage or hardinesse To sleen him Holofernes in his tent, And to deliver out of wretchednesse The peple of God? I say for this entent, That right as God spirit of vigour sent To hem, and saved hem out of meschance, So sent he might and vigour to Custance.
Forth goth hire ship thurghout the narwe mouth Of Jubaltere and Septe, driving alway, Somtime west, and somtime north and south, And somtime est, ful many a wery day: Til Cristes moder (blessed be she ay) Hath shapen thurgh hire endeles goodnesse To make an end of all hire hevinesse.
Now let us stint of Custance but a throw, And speke we of the Romane emperour, That out of Surrie hath by lettres knowe The slaughter of Cristen folk, and dishonour Don to his doughter by a false traitour, I mene the cursed wicked Soudannesse, That at the fest let sleen both more and lesse.
For which this emperour hath sent anon His senatour, with real ordinance, And other lordes, God wote, many on, On Surriens to taken high vengeance : They brennen, sleen, and bring hem to meschance Ful many a day: but shortly this is th' ende, Homward to Rome they shapen hem to wende.
This senatour repaireth with victorie To Rome ward, sayling ful really, And met the ship driving, as saith the storie, In which Custance sitteth ful pitously: Nothing ne knew he what she was, ne why She was in swiche array, ne she will sey Of hire estat, though that she shulde dey.
He bringeth hire to Rome, and to his wif He yaf hire, and hire yonge sone also: And with the senatour she lad hire lif. Thus can our lady bringen out of wo Woful Custance, and many another mo: And longe time dwelled she in that place, In holy werkes ever, as was hire grace.
The senatoures wif hire aunte was,
But for all that she knew hire never the more:
I wol no longer tarien in this cas,
But to king Alla, which I spake of yore, That for his wif wepeth and siketh sore,
I wol returne, and let I wol Custance Under the senatoures governance.
King Alla, which that had his moder slain, Upon a day fell in swiche repentance, That if I shortly tellen shal and plain, To Rome he cometh to receive his penance, And putte him in the popes ordinance In high and low, and Jesu Crist besought, Foryeve his wicked werkes that he had wrought.
The fame anon thurghout the toun is born, How Alla king shal come on pilgrimage, By herbergeours that wenten him beforn, For which the senatour, as was usage, Rode him againe, and many of his linage, As wel to shewen his high magnificence, As to don any king a reverence.
Gret chere doth this noble senatour To king Alla, and he to him also; Everich of hem doth other gret honour; And so befell, that in a day or two This senatour is to king Alla go To fest, and shortly, if I shal not lie, Custances sone went in his compagnie.
Som men wold sain at requeste of Custance This senatour hath lad this child to feste: I may not tellen every circumstance, Be as be may, ther was he at the leste : But soth is this, that at his mothers heste Beforn Alla, during the metes space, The child stood, loking in the kinges face.
This Alla king hath of this child gret wonder, And to the senatour he said anon,
"Whos is that faire child that stondeth yonder?" "I n'ot," quod he, "by God and by Seint John ; A moder he hath, but fader hath he non, That I of wote : but shortly in a stound He told Alla how that this child was found,
"But God wot," quod this senatour also, "So vertuous a liver in all my lif Ne saw I never, as she, ne herd of mo Of worldly woman, maiden, widewe or wif: I dare wel sayn hire hadde lever a knif Thurghout hire brest, than ben a woman wikke, Ther is no man coude bring hire to that prikke."
Now was this child as like unto Custance As possible is a creature to be: This Alla hath the face in remembrance Of dame Custance, and theron mused he, If that the childes moder where aught she That is his wif, and prively he sighte, And sped him fro the table that he mighte.
"Parfay," thought he, "fantome is in min hed. I ought to deme of skilful jugement, That in the salte see my wif is ded." And afterward he made his argument; "What wot I, if that Crist have hider sent My wif by see, as wel as he hire lent
To my contree, fro thennes that she went ?"
And after noon home with the senatour Goth Alla, for to see this wonder chance. This senatour doth Alla gret honour, And hastily he sent after Custance: But trusteth wel, hire luste not to dance. Whan that she wiste wherfore was that sonde, Unnethe upon hire feet she mighte stonde.
Whan Alla saw his wif, faire he hire grette, And wept, that it was routhe for to see, For at the firste look he on hire sette He knew wel veraily that it was she: And she for sorwe, domb stant as a tree: So was hire herte shette in hire distresse, Whan she remembered his unkindenesse.
Twies she swouneth in his owen sight, He wepeth and him excuseth pitously:
Now God," quod he, " and all his halwes bright So wisly on my soule as have mercy, That of youre harme as gilteles am I, As is Maurice my sone, so like your face, Elles the fend me fetche out of this place."
Long was the sobbing and the bitter peine, Or that hir woful hertes mighten cese, Gret was the pitee for to here hem pleine, Thurgh whiche pleintes gan hir wo encrese. I pray you all my labour to relese,
I may not tell hir wo until to-morwe, I am so wery for to speke of sorwe.
But finally, whan that the soth is wist, That Alla gilteles was of hire wo,
I trow an hundred times han they kist, And swiche a blisse is ther betwix hem two, That save the joye that lasteth evermo, Ther is non like, that any creature
Hath seen or shal, while that the world may dure.
Tho praied she hire husbond mekely In releef of hire longe pitous pine, That he wold pray hir fader specially, That of his magestee he wold encline To vouchesauf som day with him to dine: She praied him eke, he shulde by no way Unto hire fader no word of hire say.
Som men wold sayn, how that the child Maurice Doth this message until this emperour : But as I gesse, Alla was not so nice, To him that is so soveraine of honour, As he that is of Cristen folk the flour, Send any child, but it is bet to deme He went himself, and so it may wel seme.
This emperour hath granted gentilly, To come to dinner, as he him besoughte: And wel rede I, he loked besily Upon this child, and on his doughter thought. Alla goth to his inne, and as him ought Arraied for this feste in every wise,
As ferforth as his conning may suffice.
The morwe came, and Alla gan him dresse, And eke his wif, this emperour to mete : And forth they ride in joye and in gladnesse, And whan she saw hire fader in the strete, She light adoun and falleth him to fete. "Fader," quod she, "your yonge child Custance Is now ful clene out of your remembrance.
"I am your doughter, your Custance," quod she, "That whilom ye han sent into Surrie; It am I, fader, that in the salte see Was put alone, and dampned for to die. Now, goode fader, I you mercie crie, Send me no more into non hethenesse, But thanketh my lord here of his kindenesse.
Who can the pitous joye tellen all Betwix hem thre, sin they ben thus ymette? But of my tale make an ende I shall, The day goth fast, I wol no longer lette. Thise glade folk to dinner ben ysette, In joye and blisse at mete I let hem dwell, A thousand fold wel more than I can tell.
This child Maurice was sithen emperour Made by the pope, and lived Cristenly, To Cristes chirche did he gret honour: But I let all his storie passen by, Of Custance is my tale specially, In the olde Romane gestes men may find Maurices lif, I bere it not in mind.
This king Alla, whan he his time sey, With his Custance, his holy wif so swete, To Englond ben they come the righte wey, Ther as they live in joye and in quiete. But litel while it lasteth I you hete, Joye of this world for time wol not abide, Fro day to night it changeth as the tide. Who lived ever in swiche delight o day, That him ne meved other conscience, Or ire, or talent, or som kin affray, Envie, or pride, or passion, or offence? I ne say but for this end this sentence, That litel while in joye or in plesance Lasteth the blisse of Alla with Custance.
For Deth, that taketh of hie and low his rente, Whan passed was a yere, even as I gesse, Out of this world this king Alla he hente, For whom Custance hath ful gret hevinesse. Now let us praien God his soule blesse : And dame Custance, finally to say, Toward the toun of Rome goth hire way.
To Rome is come this holy creature, And findeth ther hire frendes hole and sound: Now is she scaped all hire aventure; And whan that she hire fader hath yfound, Doun on hire knees falleth she to ground, Weping for tendernesse in herte blithe She herieth God an hundred thousand sithe.
In vertue and in holy almesse dede
"For certes, lord, so wel us liketh you
They liven alle, and never asonder wende; Til deth departeth hem, this lif they lede: And fareth now wel, my tale is at an ende. Now Jesu Crist, that of his might may sende Joye after wo, governe us in his grace, And kepe us alle that ben in this place.
THER is right at the west side of Itaille Doun at the rote of Vesulus the cold, A lusty plain, habundant of vitaille, Ther many a toun and tour thou maist behold, That founded were in time of fathers old, And many another delitable sighte, And Saluces this noble contree highte.
A markis whilom lord was of that lond, As were his worthy elders him before, And obeysant, ay redy to his hond, Were all his lieges, bothe lesse and more: Thus in delit he liveth, and hath don yore, Beloved and drad, thurgh favour of fortune, Both of his lordes, and of his commune.
Therwith he was, to speken of linage, The gentilest yborne of Lumbardie, A faire person, and strong, and yong of age, And ful of honour and of curtesie: Discret ynough, his contree for to gie, Sauf in som thinges that he was to blame, And Walter was this yonge lordes name.
I blame him thus, that he considered nought In time coming what might him betide, But on his lust present was all his thought, And for to hauke and hunt on every side: Wel neigh all other cures let he slide,
And eke he n'old (and that was worst of all) Wedden no wif for ought that might befall.
Only that point his peple bare so sore, That flockmel on a day to him they went, And on of hem, that wisest was of lore, (Or elles that the lord wold best assent That he shuld tell him what the peple ment, Or elles coud he wel shew swiche matere) He to the markis said as ye shull here.
"O noble markis, your humanitee Assureth us and yeveth us hardinesse, As oft as time is of necessitee,
That we to you mow tell our hevinesse : Accepteth, lord, than of your gentillesse, That we with pitous herte unto you plaine, And let your eres nat my vois disdaine.
"Al have I not to don in this matere More than another man hath in this place, Yet for as moch as ye, my lord so dere, Han alway shewed me favour and grace, I dare the better aske of you a space Of audience, to shewen our request, And ye, my lord, to don right as you lest.
And all your werke, and ever have don, that we Ne couden not ourself devisen how
We mighten live in more felicitee:
Save o thing, lord, if it your wille be, That for to be a wedded man you lest,
Than were your peple in soverain hertes rest.
"Boweth your nekke under the blisful yok Of soveraintee, and not of servise, Which that men clepen spousaile or wedlok: And thinketh, lord, among your thoughtes wise, How that our dayes passe in sondry wise; For though we slepe, or wake, or rome, or ride, Ay fleth the time, it wol no man abide.
"And though your grene youthe floure as yet, In crepeth age alway as still as ston, And deth manaseth every age, and smit In eche estat, for ther escapeth non: And al so certain, as we knowe eche on That we shul die, as uncertain we all Ben of that day whan deth shal on us fall.
"Accepteth than of us the trewe entent, That never yet refuseden your hest, And we wol, lord, if that ye wol assent, Chese you a wife in short time at the mest, Borne of the gentillest and of the best Of all this lond, so that it oughte seme Honour to God and you, as we can deme.
"Deliver us out of all this besy drede, And take a wif, for highe Goddes sake: For if it so befell, as God forbede,
That thurgh your deth your linage shulde slake, And that a strange successour shuld take
Your heritage, o! wo were us on live : Wherfore we pray you hastily to wive."
Hir meke praiere and hir pitous chere Made the markis for to han pitce. "Ye wol," quod he, "min owen peple dere, To that I never er thought constrainen me. I me rejoyced of my libertee,
Than selden time is found in mariage; Ther I was free, I moste ben in servage.
"But natheles I see your trewe entent, And trust upon your wit, and have don ay : Wherfore of my free will I wol assent To wedden me, as sone as ever I may. But ther as ye han profred me to-day To chesen me a wif, I you relese
That chois, and pray you of that profer cese.
"For God it wot, that children often ben Unlike hir worthy eldres hem before, Bountee cometh al of God, not of the stren Of which they ben ygendred and ybore: I trust in Goddes bountee, and therfore My mariage, and min estat, and rest I him betake, he may don as him lest.
"Let me alone in chesing of my wif, That charge upon my bak I wol endure: But I you pray, and charge upon your lif, That what wif that I take, ye me assure To worship hire while that hire lif may dure, In word and werk both here and elles where, As she an emperoures doughter were.
« ZurückWeiter » |